DIE PROGRAM

Ons program is tien maande lank en gevul met visie, doelwitte, avontuur en uitdagings om nie net jou leierskappotensiaal te ontdek nie, maar om jou ook te help om die insig en vermoë te ontwikkel om verantwoordelike en ingeligte besluite rondom jou toekoms en loopbaanrigting te neem.

LOOPBAANKEUSES

ATKV-Postmatriek gee aan skoolverlaters die geleentheid om in ’n veilige omgewing te besin oor die opwindende, maar uitdagende toekoms wat hulle wag deur sinvolle blootstelling aan die beroepswêreld en lewensvaardighede.

ERVARINGSLEER

Kom ontwikkel nuwe vaardighede wat jou visie verbreed en jou CV ’n hupstoot in die regte rigting gee.

AKKOMMODASIE

Studente word in ’n koshuis op die pragtige ATKV-Drakensvilleoord gehuisves. Die oord is omring met sekuriteitsheinings en beskik oor 24 uur-sekuriteit.

MAAK VAN DIE GROOTMENSWÊRELD KINDERSPELETJIES

Lees meer oor ons geakkrediteerde program en laai jou inligtingsgids af.

ATKV-Postmatriekprogram

Akademie

Jy kan uit 17 geakkrediteerde aanlyn kursusse een kies om tydens jou ATKV-Postmatriekjaar te doen. Deur hierdie kursus kan jy krediete bymekaar maak vir verdere studie in jou gekose rigting, bepaal of jy werklik in ’n spesifieke rigting belangstel of bloot net jou CV meer indrukwekkend maak.

Pret

Sosialisering is belangrik vir emosionele ontwikkeling en daarom maak ons program ook voorsiening vir unieke pretaktiwiteite wat ʼn goeie selfbeeld en kommunikasievaardighede ontwikkel. Ons studente doen kultuurervarings op, doen ʼn bergfietstoer, besoek Lesotho, Mosambiek en Botswana en leer van die omgewing.

Avontuur

Die avontuursegment in ons kurrikulum bied ’n praktiese aanslag op lewensvaardigheidontwikkeling. Studente beweeg buite hul gemaksone danksy ʼn bergfietskursus, skubaduik, stap- en wildernisekspedisies, perdry ,witwaterroei, abseil en rotsklim, jag- en slagkuns, noodhulpkursus en vele meer.

Straatskerp

Ons kurrikulum fokus verder op die ontwikkeling van ʼn selfstandige en onafhanklike student wat in beheer is van sy lewe. Die straatskerpsegment bemagtig studente deur programme en praatjies oor algemene regsbeginsels, persoonlike finansies, projekbestuur, wapenhantering, veldkookkuns en vele meer.

Toekomsbeplanning

Elke ATKV-Postmatriekstudent se aanleg en belangstellingsvelde sal deur ’n bedryfsielkundige getoets word. Studente sal aangemoedig word om skaduwerk in verskillende beroepe te gaan doen om uiteindelik ingeligte besluit te neem en te bou aan ’n indrukwekkende CV.

Persoonlikheidsontwikkeling

Ons program fokus op die geheelontwikkeling van ons studente en vind daarom ʼn vastrapplek in persoonlikheidsontwikkeling. Hierdie aspek van ons kurrikulum dek onderwerpe soos algemene lewensvaardighede, persoonlikheidsontleding, emosionele intelligensie,konflikbestuur en vele meer.

DOELGERIG IN AFRIKAANS VIR ’N BLINK TOEKOMS

Doen sommer vandag nog aansoek deur ons aansoekvorm hier af te laai.

Uit die mond van die suigeling

Aan die begin van my ATKV-Postmatriekjaar het ek hand en tand baklei teen die hele idee, maar my ouers was oortuig dat dit die volgende fase van my lewe sou wees. By ons eindjaarfunksie het ek vir hulle vertel dat ek nooit vir hulle my dankbaarheid sal kan beskryf oor wat ’n groot geskenk dit toe werklik was nie. Dit is beslis iets wat niemand mag misloop nie.

Lanie Snyman

Ek het in die jaar by ATKV-Postmatriek bereik wat ek nie in die hoërskool of selfs twee jaar op universiteit kon doen nie. Aktiwiteite en ervarings wat ek net van kon droom, het ’n realiteit geword. ATKV-Postmatriek is waar vreemdelinge, familie word. Die avontuurstylopvoeding is wat uit rowwe klip ʼn standbeeld bou.

De Wet de Clercq

Dis onmoontlik om op my een hand te tel hoeveel keer ek gewonder het wat ek langs die Sterkfonteindam maak. Dis ook glad nie ’n leuen om te sê dat ATKV-Postmatriek ’n leeftyd se avontuur in een jaar is nie. ’n Tuimeltrein van emosies is dit beslis. Die herinneringe wat hier gemaak word, is iets wat ek altyd in my hart sal koester.

Leané Burger

Geakkrediteerde ATKV-Postmatriekvennote